Iniimbestigahan ng Office of the Ombudsman Philippines ang posibleng pagkakaroon ng hindi maipaliwanag na salapi ng 26 na miyembro ng Kamara na umano’y sangkot sa pagiging kontratista ng gobyerno.
Ayon kay Ombudsman Jesus Crispin Remulla, kabilang sa sinusuri ang mga cash at disbursements ng mga nasabing opisyal, pati na ang paggamit ng manager’s check bilang posibleng paraan ng money laundering. Aniya, maaaring gamitin ang pagbili ng manager’s check gamit ang cash upang maitago ang pinagmulan ng pera.
Binanggit din niya na mahigpit ang mga patakaran ng Bangko Sentral ng Pilipinas pagdating sa bank transactions, lalo na sa ilalim ng bank secrecy laws, na maaaring nagagamit sa ganitong uri ng gawain.
Nauna nang iniutos ni Remulla ang lifestyle check sa 26 kongresista matapos makuha ng Ombudsman ang kanilang Statements of Assets, Liabilities, and Net Worth.
Samantala, sinabi ni Assistant Ombudsman Mico Clavano, na ang imbestigasyon ay nakabatay sa intelligence reports na may ilang mambabatas na umano’y may kaugnayan sa contracting firms na direktang nakikipagtransaksyon sa gobyerno, na ipinagbabawal ng batas.
Patuloy ang isinasagawang mas malalim na imbestigasyon kaugnay ng nasabing isyu.
