Mahigit 6,500 pamilya sa Pangasinan ang naapektuhan ng pagbaha dulot ng tuloy-tuloy na pag-ulan mula sa Tropical Depression #MaymayPH at pinalakas na habagat, ayon sa mga awtoridad noong Huwebes, Agosto 6.
Ayon sa Pangasinan Provincial Disaster Risk Reduction and Management Office (PDRRMO), ilang ilog sa lalawigan ang patuloy na minomonitor matapos tumaas ang lebel ng tubig at lumubog ang ilang barangay.
Kabilang sa mga ilog na nananatiling mataas ang lebel ng tubig ang Marusay River sa Calasiao at Cayanga River sa San Fabian. Samantala, nananatili namang mababa sa normal ang lebel ng Sinucalan River sa Sta. Barbara at Bañaga River sa Bugallon.
Sinabi ni Calasiao DRRM spokesperson Kristine Joy Soriano na umabot na sa 6.4 talampakan ang taas ng tubig sa Marusay River kumpara sa normal nitong lebel bandang alas-11 ng umaga.
Hinimok ni Soriano ang mga residente na makipag-ugnayan sa mga opisyal ng barangay at huwag nang hintayin pang lumala ang sitwasyon bago kumilos.
Hindi bababa sa 40 barangay sa buong Pangasinan ang naapektuhan ng pagbaha. Kabilang sa mga lubhang naapektuhan ang Barangay Lasip sa Calasiao, kung saan umabot sa tuhod ang lalim ng tubig-baha.
Gayunman, may ilang residente ang piniling manatili sa kanilang mga tahanan. Ayon kay residente Gerald Mola, gagawa na lamang sila ng pansamantalang tulay na kawayan upang makatawid sa baha sa halip na lumikas.
Natukoy naman sa isinagawang assessment sa barangay na nakadagdag sa pagbaha ang pagtagas ng tubig mula sa floodgate sa likod ng dike na nagbigay-daan para pumasok ang tubig mula sa ilog.
Ayon kay Barangay Councilwoman Mercy Ferrer, pinalala rin ng kakulangan sa drainage at pagtaas ng kalsada ang pag-ipon ng tubig sa mga kabahayan.
Samantala, inilikas ng ilang residente ang kanilang mga alagang hayop patungo sa mas mataas na lugar upang maprotektahan ang mga ito mula sa baha.
Sa Barangay Lasip sa Dagupan City, itinaas naman ng mga residente ang kanilang mga gamit at appliances matapos maranasan muli ang pagbaha na umaabot sa lebel ng kalsada.
Patuloy namang binabantayan ng mga awtoridad sa Mangaldan ang mga barangay malapit sa Angalacan River, kabilang ang mga irrigation system na maaaring maapektuhan kung magpapatuloy ang malakas na pag-ulan.
