TUGUEGARAO CITY -Nagimmang y trabahu na onstruction workers megafu ta tinuggi na miembro New Peoples Army y heavy equipment nga usan da ta pagangwa da ta Alcala,Cagayan.
Kinagi ni 17th Infantry Battalion commanding officer Rembert Baylosis nga problemado sangaw y trabahador ira megafu ta ari da nga makatrabahu.
Amung na yaw kinagi ni Baylosis,pinalakak anna tinutukan na NPA y trabahador ira habang maddaggunan da nga tugyan y duwa nga backhoe,tadday nga mixer anna pison anna ina da y susi na tadday nga takay.
Base kanni Baylosis, makiddaw y suspek ira ta revolutionary tax ta construction company nga igga proyekto na ta dalan.
Megafu taw ay pinakkajanan ni Baylosis nga terorista nga grupo y NPA megafu ta kukukwan da nga mangdaral ta rumenta.
Sangaw ay amwan da paga nu piga y balor na tinuggi da nga heavy equipment nga partially damaged anna kune gappa ta tinuggi da nga elf truck na construction company.
