Posibleng ilabas na ni US President Donald Trump bago pa man ang nakatakdang pormal na paglagda sa Biyernes ang paunang kasunduan sa pagitan ng Estados Unidos at Iran na naglalayong wakasan ang tensyon at sigalot sa rehiyon.
Ayon kay US Vice President JD Vance, maikli lamang ang memorandum of understanding (MOU) na nagsisilbing balangkas ng kasunduan, ngunit nakapaloob dito ang mga pangunahing pangako ng magkabilang panig na magsisilbing gabay sa susunod pang negosasyon.
Sinabi ni Trump na pirmado na ang kasunduan sa elektronikong paraan ng mga kinatawan ng US at Iran, habang inaasahang pormal itong lalagdaan sa Geneva sa Biyernes.
Kabilang sa mahahalagang probisyon ng kasunduan ang pangako ng Iran na hindi magde-develop ng nuclear weapons at ang pagsusulong ng kapayapaan at katatagan sa rehiyon.
Kapalit nito, maaari ring pag-usapan sa mga susunod na negosasyon ang ilang benepisyo at posibleng pagluwag ng mga parusa laban sa Tehran.
Inaasahan ding muling bubuksan ang Strait of Hormuz sa Biyernes, isang mahalagang ruta ng pandaigdigang kalakalan ng langis na matagal na naging sentro ng tensyon sa Gitnang Silangan.
Samantala, nakatakdang talakayin ng mga lider ng G7 ang usapin ng Iran sa isang espesyal na pagpupulong sa France, habang patuloy na binabantayan ng pandaigdigang komunidad ang magiging epekto ng kasunduan sa seguridad at ekonomiya sa buong mundo.
