TUGUEGARAO CITY- Nabisto ang barter system sa kalalakalan ng illegal na droga kapalit ng mga nakaw na motorsiklo sa pagkakahuli ng isang 23-anyos na lalaki sa bayan ng Aparri, Cagayan.
Itoy matapos mahuli sa ikinasang buy bust operation ng PNP si Aldos Pamittan ng Brgy Macanaya, Aparri at tubong Brgy. Cataggamman, Tuguegarao City.
Sa panayam ng Bombo Radyo, sinabi ni PCAPT Mario Maraggun, hepe ng PNP Aparri na ipinagpapalit ng suspek ang kanilang ninanakaw na motorsiklo sa marijuana na kanya namang ibinebenta.
Ayon kay Maraggun, bago ikinasa ang operasyon laban sa suspek ay minanmanan muna ito sa kanyang iligal na gawain.
Narekober sa suspek ang isang sachet ng tuyong dahon ng marijuana at P500 na buy-bust money habang nagpositibo naman ito sa droga matapos isailalim sa drug test.
Sinabi ni Maraggun na inamin umano ng suspek na sangkot siya sa ilang mga motornapping incidents kung saan tinutukoy na ng pulisya ang pagkakakilanlan ng kanyang mga kasamahan.
