Tuguegarao City-Netoli ta Bombo Radyo Tuguegarao y personal nga gamit na duwa nga pulis nga dinis-armahan na New People’s Army (NPA) ta kabalin nga tallungan da y sub-station na PNP ta ili na Amulung, Cagayan.
Yaw ira ay y pitaka ni PO3 Roel Laxa anna PO1 Rommel Pagulayan nga igga nadiyan na nga Identification Cards (ID), bank book, lisensiya na palattuk anna P12,000 cash.
Netoli gapa y cellphone na pulis, visa registration form anna dokumento nga kukwa na nuwang nga nevulu turi ni-raid da y PTU Annafatan.
Kavulu gapa taw y tura para ta miyembro na PNP ta ili na Amulung nga maggafu ta Danilo Ben Command-NPA West Cagayan.
Kinagi da taw nga nga annallung da ta opisina na pulisya ay megafu ta pagkundena da o parusa da kanu ta iningwa da nga paniniktik ta grupo anna pangusa na opisyal da kanu nga massamantala ta residente ira.
Matageno nga ina na NPA y tallu nga M16, tadday nga M14 anna duwa nga 9mm pistola anna ina paga na NPA y takay na pulis nu anni narekober yaw nga natuggi ta tadday nga sitio ta Amulung.
