Labis ang tuwa ni Johanna Fae Navarro mula sa bayan ng Baggao, Cagayan matapos makamit ang Rank 8 sa kakatapos lamang na Certified Public Accountants Licensure Exam (CPALE) 2024.
Ayon kay Navarro, hindi niya inaasahan ang tagumpay na ito dahil ang pangunahing layunin lamang niya ay makapasa sa pagsusulit. Subalit, nagpasalamat siya nang sobra dahil hindi lamang siya nakapasa, kundi napabilang pa siya sa Top Natchers.
Binanggit din ni Navarro na hindi naging madali ang kanilang pagsusulit, lalo na at anim na subject ang kanilang sinagutan.
Nagsimula umano ang kanyang pagrereview noong Hunyo at tumagal ng limang buwan, ngunit dahil na-delay ang exam, nag-extend siya ng isang buwan pa para magreview.
Isa sa mga nagsilbing inspirasyon ni Navarro upang magpatuloy sa kanyang paghahanda ay ang kanyang pamilya, na hindi siya pinabayaan at palaging nagsusustento ng moral na suporta.
Sa ngayon, plano ni Navarro na mag-aplay ng trabaho sa larangan ng Audit at patuloy na magsikap upang makamit ang kanyang mga pangarap.
