TUGUEGARAO CITY – Awan ta plano ni Kalinga Governor Jocel Baac nga iapela ta Court of Appeals (CA) y desisyon na Office of the Ombudsman ta suspension na ta annam nga vulan.
Kinagi ni Baac nga nangina y mangiyune ta apela yatun ta kaya na laggapa nga tunugan y suspension order na.
Amung na yaw ay kinagi na gobernador nga nakiltu iyya turi malawa na y suspension order megafu ta y ammu na ay ari netuluy y kaso na nga abuse of authority anna conduct unbecoming of an official nu anni ay nalawa yaw na gobernador turi June 9.
Manguruk si Baac nga igga asunto ta pulitika anna pananabotahe ta administrasyon na y kaso megafu ta neddan sa y maximum penalty.
Namegafu y kaso ni Baac ta annuntuk na ta provincial board secretary nga si Mathew Matbagan turi May 2015.
Kinagi ni Baac nga y nakagi nga alegasyon ngamme aminan na nga kinuwelyuhan anna kinadjawan na si Matbagan megafu ta gazzi na ta maling termino nga nakepay ta resolusyon nga kiniddaw na nga vukatan y tadday nga ospital ta Kalinga.
