Naghain na ng petisyon ang ilang grupo ng mga magsasaka upang hilingin sa Korte Suprema ang pagharang sa pagpapatupad ng Executive Order No. 62.
Ang EO 62 na inilabas ni PBBM ay ang pormal na pagpapababa sa taripang sinisingil sa mga inaangkat na bigas mula sa kasalukuyang 35% patungo sa 15%. Magtatagal ito hanggang sa taong 2028.
Kabilang sa mga natungo sa Korte Suprema upang pormal na maghain ng petisyon ay ang grupong Samahang Industriya at Agrikultura(SINAG), Federation of Free Farmers, at MAGSASAKA Party-list.
Hinihiling sa petisyon ng mga grupo ang paglabas ng Temporary Restraining Order(TRO) bago pa man ang napipintong implementasyon ng EO 62 sa July 6, 2024.
Nanindigan ang grupo na hindi magiging mabisa ang EO 62 para maibaba ang presyuhan ng bigas sa mga merkado dahil ang ibang mga bansa pa rin ang posibleng magpapasya o magdidikta sa presyuhan ng kanilang ibebentang bigas.
Iginiit din ng grupo na hindi dumaan sa akmang konsultasyon ang tuluyang pagtapyas ng taripa ng imported rice, bago pa man ito inaprubahan
Una nang nangako ang mga naturang grupo na haharangin nila ang implementasyon ng EO 62 kasabay ng paglabas nito noong kalagitnaan ng Hunyo.
