LTFRB, amwan da paga nu kolorum y bus nga natannak ta puwente ta Nueva Ecija

TUGUEGARAO CITY – Amwan sangaw na Land Transportation Franchising and Regulatory Board o LTFRB Region 2 nu legal y agoperator na bus nga natannak ta puwente ta Capintalan, Caranglan, Nueva Ecija.

Ta interview na Bombo Radyo kanni Geraldine Callangan, Information Officer na LTFRB Region 2, ari da kanu nga ammu nu sinni y operator na bus megafu ta awan tu rekord na ta data record na Leo Maric bus.

Yatun ta y plate number na bus nga AVS 757 y sitan da ta record da baka sakali nga mamwan da nu sinni y operator na yaw.

Makiergo da gapa ngana ta LTFRB Region 1 nga posible kanu nga tari nerrehistro y nakagi nga bus.

Olu nga nenawak na LTFRB RO2 nga awan tu Leo Maric bus nga mabbiyahe ta Cagayan nga mappunta ta probinsya na Ilocos anna Abra.