TUGUEGARAO CITY-Nenawak na Mines and Geosciences Bureau (MGB)region II nga tuluy laman y operasyon na Oceana Gold Mining Company sa Didipio,Kasibu, Nueva Vizcaya maski igga suspension nga neddan na Department of Environment and Natural Resources (DENR).
Base kanni Director Mario Ancheta na MGB Region II,nga awuya nga magapela y mining company kanni Presidente Rodrigo Duterte ngamme awuya da laman nga ituluy y operasyon da.
Fera taw ay napprotesta y anti-mining group ta arubang na Oceana Gold tapenu ipilit da nga magimmang yaw.
Kinagi ni Analiza Cattig, miembro na anti-mining group ta nakagi nga ili nga mattura da mangngana kanu kanni sa nasabing barangay na susulat sila kay Presidente Duterte tapenu ipaimmang anna ipesara da y mining company ta nakagi nga lugar.
Namwan kanni Cattig nga ari da mangimmang adde ta iyimmang da y operasyon na minahan nga namegafu turi 1991 megafu ta dakal kanu nga perwisyo ta totolay ira.
Kettu gapa y supply na danum kanu ngana ta aranni nga barangay na minahan megafu ta nadaral ngana y bakuluk nga paggafanan na danum.
Kinari ni Cattig nga iyangan na ta Maynila y protest rally tapenu ipasita da ta gobyerno y angongtra da ta operasyon na minahan tari.
