Inihayag ni dating US Vice President Kamala Harris na pinag-iisipan niyang muling tumakbo bilang pangulo ng United States sa halalan sa 2028.
Sa kanyang pagdalo sa pagtitipon ng National Action Network na itinatag ni Al Sharpton sa New York City, direkta siyang tinanong kung muli siyang tatakbo, kung saan sinabi niyang pinag-iisipan niya ito.
Dagdag ni Harris, isasaalang-alang niya ang pagtakbo batay sa kung sino ang pinakamainam na mamuno para sa mamamayang Amerikano sa 2028.
Si Harris ay nagsilbing bise presidente sa ilalim ni Joe Biden at naging kandidato ng Democratic Party noong 2024, ngunit natalo siya kay Donald Trump na nagwagi sa parehong popular vote at Electoral College.
Bago ito, naging senador siya ng US at attorney general ng California.
Gayunpaman, maaaring humarap siya sa hamon kung muling tatakbo, dahil ayon sa ilang survey, nais ng ilang botante na makakita ng bagong liderato sa Democratic Party matapos ang kanyang pagkatalo noong 2024.
Sa parehong event, dumalo rin ang iba pang posibleng kandidato ng Democrats tulad nina Josh Shapiro, Pete Buttigieg, at JB Pritzker.
