Inaasahang tatalakayin ng International Criminal Court (ICC) Appeals Chamber ang hamon sa hurisdiksiyon na inihain ng depensa ni dating Pangulong Rodrigo Duterte.
Ito ay kasunod ng desisyon ng Pre-Trial Chamber I ng ICC noong Oktubre 23 na ibasura ang naunang kahilingan ng depensa.
Ang hamon ay iniakyat sa Appeals Chamber noong Nobyembre 14, at ang magiging pasya rito ay pinal at magsisilbing batayan sa mga susunod na kaso, kabilang ang posibleng pananagutan ni Senador Ronald Dela Rosa.
Nakatuon ang argumento ng depensa sa pag-alis ng Pilipinas sa Rome Statute at ang pagsasabing hindi na dapat mapasailalim sa hurisdiksiyon ng ICC ang bansa.
Ayon sa proseso, may hanggang apat na buwan ang Appeals Chamber upang maglabas ng desisyon.
Kasabay nito, patuloy ang pagsusuri sa kalusugan ni Duterte upang matukoy kung kaya niyang sumailalim sa paglilitis.
May takdang petsa ang panel ng mga doktor hanggang Disyembre 5 para isumite ang medical evaluation, habang hanggang Disyembre 12 naman ang depensa, prosekusyon, at kinatawan ng mga biktima para sa kanilang obserbasyon.
Inaasahang makalalabas ang pinal na desisyon sa unang bahagi ng 2026.
Kung mapatunayan na nasa maayos na kondisyon si Duterte, maaaring itakda sa Pebrero ang confirmation of charges hearing.
Ang taong 2026 ay posibleng maging pormal na simula ng paglilitis kaugnay ng mga alegasyon sa war on drugs.
