TUGUEGARAO CITY-Nasimwan ngana y lima nga nawawan nga mappaparyentes ta kabalin nga makka-aberya y nattakayan da nga barangay ta kayan nga parte na Calayan Island.
Ta impormasyon nga nala na Bombo Radyo,kinagi ni Ensign Joel Nieva,na Philippine Coast Guard ta Aparri, Cagayan nga natolay y appa kannira habang yari tadday ay mafuri ngana turi masimwan ira na mesesira ta Dalupiri ta isla na Calayan.
Base kanni Nieva urwan ngana na medical team na LGU Calayan y survivors ira habang tuloy laman y retrieval operations na Coast Guard anna Philippine Navy ta natay nga pasahero na napalakak nga barangay.
Olu taw ay malubbe ta Camiguin Island nga maggafu ta Calayan Island y familya Pagarita turi makka-aberya y nattakayan da nga barangay ta tangga na kayan turi July 18.
