Nanatiling kabilang ang Pilipinas sa mga bansang may pinakamataas na minimum age of criminal responsibility sa Asya sa kasalukuyang edad na 15 taong gulang, alinsunod sa Republic Act No. 9344 o Juvenile Justice and Welfare Act.
Sa ilalim ng batas, hindi maaaring papanagutin sa kasong kriminal ang mga batang 15 taong gulang pababa at sa halip ay isinasailalim sa intervention at rehabilitation programs.
Samantala, ang mga menor de edad na lampas 15 ngunit wala pang 18 taong gulang ay maaari lamang managot kung mapatutunayang kumilos sila nang may discernment.
Muling nabigyang-pansin ang usapin matapos ang madugong pamamaril sa isang paaralan sa Tacloban City na kinasangkutan ng dalawang menor de edad na suspek na may edad 14 at 15.
Kasunod nito, ilang opisyal at mambabatas ang nanawagan na muling repasuhin ang batas at ikonsiderang ibaba ang edad ng criminal responsibility.
Kabilang dito sina Senador Robin Padilla at Senador Ping Lacson, habang nagpahayag naman ng suporta ang Philippine National Police sa panukalang amyendahan ang umiiral na batas.
Gayunman, iginiit ng Juvenile Justice and Welfare Council na naaayon sa mga pandaigdigang pamantayan ang kasalukuyang threshold ng Pilipinas.
Ayon sa United Nations Committee on the Rights of the Child, hinihikayat ang mga bansa na magtakda ng minimum age of criminal responsibility na hindi bababa sa 14 na taong gulang.
Sa Asya, 14 taong gulang ang minimum age of criminal responsibility sa Japan, South Korea, China at Vietnam para sa ilang mabibigat na krimen. Nasa 12 taong gulang naman ito sa Indonesia, habang 10 taong gulang sa Singapore.
Samantala, sinabi ng Malacañang na bukas si Pangulong Ferdinand Marcos Jr. sa anumang panukalang maipapasa ng Kongreso kaugnay sa pagbabago ng edad ng criminal responsibility.
