Ibinasura ng Sandiganbayan ang mosyon ni dating senador Ramon “Bong” Revilla Jr. na humihiling sa pag-inhibit ni Associate Justice Karl Miranda sa kasong malversation laban sa kanya, dahil sa kawalan ng merito.
Sa Resolusyon na may petsang Pebrero 10, sinabi ng anti-graft court na tungkulin ni Miranda na ipagpatuloy ang pagdinig sa kasong may kaugnayan sa umano’y ₱92.8 milyong “ghost” flood control project sa Pandi, Bulacan.
Ayon sa korte, ang pag-inhibit nang walang malinaw na patunay ng personal na interes o pagkiling ay magbubukas sa forum-shopping at makaaapekto sa mabilis at patas na administrasyon ng hustisya.
Hiling ng kampo ni Revilla ang inhibition dahil ang kapatid ni Miranda na si Buenaventura ay nagsilbing counsel ni dating Public Works Undersecretary Roberto Bernardo sa Senate inquiry sa flood control anomalies. Kalaunan ay itinalaga si Bernardo bilang state witness.
Binanggit din ng korte na ibinunyag ni Miranda ang personal niyang pagkakaibigan sa lead counsel ni Revilla na si Ramon Esguerra, subalit iginiit ng Sandiganbayan na ang mga patakaran sa inhibition ay dapat ilapat nang may maingat na pagsasaalang-alang sa pagiging walang kinikilingan.
